Jiem lah Riddu Riđđust taamgin ive. Tääl kal jiem ličij vaijamgin, ko kesimáánu lâi tievâ pargo já paijelittáá páásám kuátiorron tipšođ puáris äijihân oovtâ mánuppajan. Algâive já loppâkiiđâ maŋa lam muđoi-uv aaibâs loopân puállám teikkâ masa jo kunnâlum, ete pyereeb orostiđ váhá.

Ko kerdi jiem lah monâmin kuussân eres ko Pärttihân teikkâ Avelân, lâi must äigi juurrâđ Youtubest. Laaviim keččâđ tobbeen meikkivideoid, rähistâm toid! Ohtâ nieidâ kiän čuávum tobbeen liiges tääl álgám porgâđ taggaar háástu ko Finish Five, mast kalga irâttiđ kevttiđ loopân vittâ meikkitiiŋgâ. Já mun še tiävstum servim. Täst láá muu vittâ (plus vittâ) tiiŋgâ, moigijn irâttâm kiergâniđ ovdil čohčâmáánu 23. peeivi. (Tot lii čoovčâ älgimpeivi kostnii mailmist, ja munjin kal meid tohhee.)

Muu olmâ mittomeeri lii kiergâniđ taijgijn:

• NYX Stay Matte But Not Flat meikkipuuter — Mun kiävtám táid uáli jotelávt, já vissâsávt kiergânâm ovdil čoovčâ. Pääihist lii nube tággáár (váhá kuovgâdub) vyerdimin! 😀
• Maybelline Fit Me čiehâmâs (ivne 25) — Taan ferttee horgâ muđoi-uv leggistiđ, ko ostim taam moonnâm čoovčâ. Lam kal jo uáli ennuv taam kiävttám-uv, vaarâ uástám uđđâs talle ko taat nohá.
• e.l.f. Studio Contouring Blush & Bronzer ruopsânj já rušmostâs (St Lucia) — Taat lii jo nuhâmin ko lam kiävttám taam 2013 loppâive rääjist, já ááigum še opâttâllâđ kevttiđ val rušmostâs olmânáál. Leggistâm ko ruopsânj nohá.
• Rimmel kulmepennâ (004 Black/Brown) — Taat še lii lamaš must uáli kuhháá, 2013 rääjist, já forgâ nohá. Vaarâ uástám uđđâs, taat lii eivi pyeri ige must lah mihheen eromâš hááluid lonottiđ.
• NYX More to Love româsivne. Eivi ok, mut ij puoh pyeremus, halijdâm tuš kevttiđ já leggistiđ.

Toi lasseen ááigum še kiergâniđ taigijn teikkâ kevttiđ nuuvt ennuv ko peri máhđulâš:

• IsaDora kulmehammiittâs — Ostim taam kiđđuv já lijkkuum taas ko kulmeh pisoh häämistis. Kustâ lii kuittâh váhá eromâš já ááigum lonottiđ moosnii mast lii váhá ucceeb já anolub kustâ.
• L’Oréal Le Khol ruškes čalmeraaijam — Must láá pyerebeh-uv, halijdâm tuš kiergâniđ tain.
• Milani Anti-Feather poovsâraaijâm — Taat lii hirmâd pyeri mut jiem lah tuš vuámmášâm kevttiđ! Taat lii ivnettem nuuvt ete suápá puoh poovsâmaalâigijn.
• Wet n Wild čalmemeikkivuáđudâs — Hirmâd šiev, mut taat lii lamaš must meiddei 2013 rääjist já kolgâ leggistuđ. Must lii nube vyerdimin vuárkkáást.
• Neutrogena Healthy Skin Enhancer — Piäiválâš skippáár, kiergânâm tain vissâsávt. Hirmâd šiev ivnevuoidâs most lii peivisyeiji já váhá meid retinol. Rähistâm!

Väljejim nube eeri vuossmuu skipárin ko vuámmášim ete must láá ennuv meeikih moh jo jyevdih kevttuđ já leggistuđ, já jurdâččim ete pyereeb jis taigijn puávtáččij rähtiđ ubâ peivimeeiki (koveh pajabeln). Piejâm piäivádâsâid ovdánmist porgemáánu ja čohčâmáánu aalgâst, já talle majemuu peeivi, čohčâmáánu 23. Jis lohhein láá meikkitiiŋgah moh juávdáččii kevttuđ meddâl, muštâliđ váá! Teikkâ älgiđ meid taam háástu 🙂