Mun lam kuhháá kapšâttâllâm jurduu sämikielâlii kalenderist/peivikirjeest. Anarâš kalender, mon Anarâškielâ servi rs almostit, lii hirmâd suotâs já anolâš, mut tom ij lah vuovâs nutkâliđ laavkân ko lii vyelgimin paargon teikâ škoovlân. Taažâ peln rahtii tovle tavesämikielâlijd kirjekalenderijd, já mun lijkkojim čuuvtij, mut toh iä lah innig kuhes ááigán oinum — vaarâ toh láá tivrâseh rähtiđ já teddilittiđ, já kevtteeh uccáá.

Juurdâ sämikielâlii peivikirjeest iälá kuittâg ain muu mielâst. Tai aaigij maailmist láá maaŋgâlágán peivikirjeh já vuávámriäiduh sehe pááppárhäämist já digitaallâžžân, ijge lah mihheen suujâid toos mane taggaar ij toimâččij meiddei sämikielân. Te mun meridim tääl jieččân já motomij iärásij táárbui várás keččâliđ rähtiđ olssân mottoomláán kalendervuáđu. Vuossâmuš uási taan projektist lii okkovuávám.

Täst iä lah valmâšin peivimereh, vâi tom puáhtá kevttiđ jyehi áinoo oho. Mun lam pieijâm valmâšin toos soojijd kogo puáhtá merkkiđ, mon pyereest lii uáđđám já lii-uv lihâdâm jna. já taan teema lii-uv tággáár argâpeeivi pyereestvaijeem. Nube siijđostkis lii saje om. purrâmušvuávám rähtimân já eres jurdui muušton merkkiimân.

Mun lam rähtimin meiddei peivisiijđo, moos lii väridum saje čieŋâlub smiettâmuššáid já täärhib vuáváámáid. Áigumuššân lii, ete loopâst šodâččij oles ive kukkosâš peivikirje sierâ vuávám- já suogârdâllâmsijđoiguin mottoom muddoost puátteevuođâst.

Puávtáh luođiđ vuávámvuáđu taan liiŋkâ peht:

Okkovuavam anaras laskud (A4, kyehti siijđo, PDF, 90 kst)

Huámmáš vala, ete taat ij lah nuuvtkin uáivildum eidu pargo teikâ škoovlâ várás, peic persovnlâš – já päikkikiävtun. Taat lii aaibâs vuossâmuš versio, já sáttá leđe ete tom ferttee keččâlem já macâttâs mield mutteđ. Vuávámriäidu lii uáivildum čälittemnáál A4-pápárân, já tondiet tot ij lah ivnáá, mutâ ama tom puáhtá kevttiđ meiddei digihäämist.

Tuáivu mield taat vuávámvuáđu lii kevtteid iššeen já ävkkin! Jis laš mii peri macâttâsâid täst, čäälist aainâs veikâ šleđgâpoostâ vuáđu nube siijđon čallum čujottâsân. Hitruus čohčâ puohháid!