Kyehti ive láá kuullâm ton maŋa ko čälistim majemuu čalluu taan blogin. Keesi 2015 maŋa lii meiddei tábáhtum ennuv – eidu ko lijjim piejâmin Oulu aassâmsaje ornigân, te värrejim jo maassâd Anarân, ja tastmaŋa vala moddii Aanaar kirkkosiijdâ siste, jeđe loopâst vala Kammâsân. Adai taah láá lamaš tuotâ varriistâllâmiveh munjin.

Algâttim čohčuv 2015 pargo Säämi Kielâkäldee -projektist, já pargo nohá te cuáŋuimáánust 2018. Tot lii tiäđust-uv páinám taam eellimmudo, ko sämikielâst šoodâi vistig muu peivipargo já tastoo vala ollâopâttuvâst muu válduaamnâs. Algim iävtukkâssân čoovčâ 2015 sämitiggevaljáid, já peessim 89 jienáin čoođâ já lam tääl meid säämi kielârääđi saavâjođetteijee. Adai sämikielah láá šoddâm muu ”válduaamnâsin” meiddei politiikâst. Tondet lii-uv penttâ heeppâd ko jiem lah maiden maka áppádâm čäälliđ teehi maiden!

Taat blogi lii lamaš já puátá ain leđe tággáár persovnlii eellim pirrâ uvâstâllâm saje. Politiikâst já kielâaašijn koolgâm še čäliškyettiđ, mut eres arenain. Tääbbin, tääl, halijdâm saje leđe tuš olmooš. Uážžu kal leđe čiävláá já ilolâš et mist lii ain Anarâš lostâ, Yle Säämi já eres falâldâh sämikielân, mut jis puoh mii sämikielân čálloo lii ain jo-uv äšši- tâi uđâstekstâ te ijhan totkin lah aaibâs pyeri. Tane lijjim nuuvt moovtâ ko muu blogin pieijii liiŋkâ Anarâškielâ seervi Čyeti čälled -proojekt sijđoid! Tuáivu mield taan blogi čalluuh láá monnii verd movtijdittám iärásijd-uv čäälliđ, teik tuš veikkâ makkuuttâm váhá anarâškielâlijd lohheid.

Fiäráneh láá veik mon ennuv main čäälliđ teehi, já tääl lopedâm leđe aktivlub meiddei tain blogijn. Kove lii Gievdanvággi-nommâsâš saajeest Ivguvuonast (Steindalsbreen), kost eellim syeinimáánust vaaccâšmin jieŋâduv alne. Jis veikkâ ohtii máánust-uv happiittičij maidnii čälistiđ 🌚