Onne poođij poostâ mield kuárus smiŋkkâpaaleet, mon lijjim tiiláám ovdil Kanada reeisu. Must láá muádi luomâivnepaaleet moh iä lah ain uáli anoliih, ko motomeh láá hirmâd stuárráh já vaigâdeh kevttiđ. Ovdâmerkkân e.l.f. Beauty Book, moos kal lijkkuum ennuv, mut lii pááccám keevtihánnáá tanen ko tot lii nuuvt hevvet styeres. Tom lasseen must lii juurrâm loovâi ponemuššin ohtâ puáris H&M neelji ivne paaleet most še láá eivi pyereh ivneh, mut oppeet paaleet jieš lii váhá vaigâd kevttiđ. Čižetpeln uáinivetteđ puáris palettijd, uálgišpeln uđđâ, ucceeb paaleet. (Valdim kuuvijd váhá hiäjus čuovâst, sorry!)
Neetist kávnojeh veik magareh ravvuuh palettij ovtâstittem várás (googlet “eyeshadow depot”, styeremus uássi ravvuin lii eŋgelâskielân). Olmânáál ko tágárijn homáigijn parga, kolgâččij puoh niävuid putestiđ pyereest já kevttiđ syejihaanskaid, tanen ko luomâivneh kiävttojeh alda čoolmijd, já bakteerih peessih toi peht älkkeht čoolmáid. Ete muštevetteđ hygieenlâšvuođâ!
Jieš porgim suullân nuuvt, ete vistig lieggiittim vuoptâkoškejeijein paaleet tuáváápeln. Tággáár häälbes palettijn ivnepuáluh láá táválávt lijmájum kiddâ palettân, já lieggiitmáin lijmá smiärru já ivnepuálu puáhtá nijbijn njizzeđ palettist. Tast kalga leđe várulâš amas cuovkkiđ ivnepuálu! Kierdiivâšvuotâ lii tergâd taan pargoost. Kánnát-uv hárjuttâllâđ váhá tággáár hälbeb smiiŋkâin vistig.
Ivnepuáluh láá táválávt mottoommuđoš metallist rahtum, mut puoh, eromâsávt häälbes smiiŋkâin, iä lah magneetliih. Talle toi tuáhá puáhtá lijmáđ magneettarra teik táválii kyehtipiällád teippipitá, vâi puálu piso uđđâ sajestis. Jieččân mielâs tánávt lii älkkeeb meridiđ maggaar iivnijd áigu kevttiđ ko uáiná toid viisut siämmást, já kenski uástám val lase tágárijd! Kyehti stuorrâ palettist šoodâi tääl ohtâ ucceeb love ivne paaleet — veik must loopâst nijbe váhá njulččájij-uv oovtâ ivne oolâ, ij tot häittit maiden.
Tággáár magneetpalettijn puáhtá še lonottâllâđ iivnijd palettij kooskâst jis veik vuálgá kuusnii já tiätá et ija taarbâš ko muádi ivne. Jiem kal tuostâččij täid leggistiđ veik kirdemmaašen rááijun, mut pääihist já juuhlijn tuáimá eivi pyereest.
Návt koleh muu pyecceepeeivih pääihist. Maht tist?