Mun lam meridâm, ete jiem ovdán luuhâmháástust nummeeroornig mield, pic luvâččâm maid luvâččâm talle ko oro vuovâsin. Vuossâmuš luhhum kirje lâi munjin Tove Jansson čäällim já Ilmari Mattus jurgâlem klassisâš muumimaainâs Tijdâtälvi, mii lii must taan háástust viiđâd čuágá peht sämikielâlâš kirje.

Jieš mainâsist lii ettum ennuv já tot lii heiviittum teatterân, animaation já kuhes filmân, já tot lii vissásávt iänááš ulmuid uápis. Muumistáálu morráán tälvinaharijnis kaskoo täälvi já uáppásm uđđâ, omâs maailmân kost sun ij tuubdâ masa kiämmán. Ilmar mučis, riges sämikielâ lii älkkee luuhâđ já omâs saanij merhâšume lii návt viereskielâlâš sárnoi-uv älkkee kiäčudiđ uápis mainâsist.

Čaabâkirjálâšvuođâ jurgâlem ij lah aaibâs älkkee, ko talle ferttee suogârdâllâđ meiddei algâtyeje (tâi jurgâlemnáál tyeje – Taikatalvi lii vistig čallum ruotâkielân) kielâ já ton register já ”šuoŋâ” (jiem hoksáá tääl pyereeb sääni). Tot ij lah siämmáá ko äššiteevstâin, main siskáldâs já ton tärkkivuotâ láá tehálumoseh, ige eissigin tuše pardeđ sääni nube maŋa.

Nuuvt ete stuorrâ kijttoseh Ilmarân, ko sun lii puáhtám taam mainâs meiddei sämikielâlii maailmân nuuvt ete tom tobdá ain siämmáš maainâsin! Avžuuttâm taam kirje tiäđust-uv puohháid, eromâšávt taid kiäin láá sämikielâliih párnááh tâi kiäh láá jiejah viereskielâliih tegu mun kiäh halijdeh vijđediđ jieijâs kielâibárdâs. 🙂