Tääl oro lemin tággáár peivi teikkâ fáddá ete pyereeb čäälliđ sämikielân! Orjâlâškielâg čaalâ puátá talle maajeeld 🙂

Algâttim oho kuhes, kuhes kävppimoohijn. Jiem laavii ennuv juurrâđ kaavpijn jiemge lijkkuu toos, já lijjim jo valjim ovdilkietân maggaar káálvuid áigom uástiđ, mut Oulust lâi nuuvt nievres šoŋŋâ ete iimâš, ko aavdoh pissoo luodâ alne. Pieggii ja nuuvt suhes purgâ val ete ilá oinijm kuus moonáim. Já fakkist vuámmášim et kolgim val nube käävpist muádi kilomeetter keččin viežžâđ val maidnii eres káálvuid moh iä lam vuossmuu käävpist kavnâmist. Luhhoost must lâi kierdivâš vyeijee — stuorrâ kijttoseh Outi-siäsásân! 💖

Ovdeeb čallustân vaidâlim, ko lii nuuvt vaigâd kavnâđ viäsukáálvuid sämmilâš teemáin. Na, luhhoost mist lii Suomâst the next best thing: Vallila! Já meiddei Marimekko, veik tom ovdeeb peeivi mainâšimgin váhá tegu tot ličij uáli passé — tuotâvuođâsthân áinoo mii Marimekkost lii passé ja boring lii Unikko já säärgispääiđih, toid jiem viišâ innig uáiniđgin, mut Marimekko ráhtá ennuv iärrás-uv. 

Na, taan vuáru väljejim kuittâg Vallila hervâttiđ muu puárispiijgáboksi. Kovvoos nommâ lii Leijonapalmu. Jiem lah kuássin kulâttâm návt ennuv ruuđâ moossân tekstiilân jiemge tuođâigin lasâlijnáid, já tah lijjii val vyeledâsâst! Mut kal tah láá muččâdeh tegu poolvah ama nuuvt 🙂 Pittááš val paasij kuáddáulguu várás! Tääl ij lahgin ko tivottiđ kuárrummaašin.

Eehid peln lam val pieijâm stuorrâ tiiláám Ikean já tuáivum et sij toimâtteh talle ko láá lopedâm-uv. Nube ilddee já čäällim/pargopevdi liččii jo tääl uáli taarbâšliih.

Ohtâ lamppâ vuárdá val stellejeijee uáđđimaalkoov pajabeln, ko káátust lii tuš sukkârpittá, já halijdâm toos pieijâđ olmâ šleđgâskuápu. Tääl lii jo 2015 já sukkârpitáh kuleh muu peeleest ovdeeb ihetuháttân.

Teema lii kuittâg vissâ jo čielgâs: lodeh, riseh já kukáh. Lodeh láá pááccám siäinán ovdeeb ässeest, já siämmáámuđošeh láá meid olgouuvsâst. 

Mut tehálumos vuossaargâ uástus lâi kuittâg taat, uánihis säminieidâi já -ááhui káijoo: ollâstuálu! Muu eellim lii nubástum uáli tievâslávt, ko jiem taarbâš ervidâllâđ miisun skaapij pajemui ilddein puáhtá koččâđ uáiván. Jessss!

Tánávt taat argâeellim kuuloold hámášuvá. Peeivih kukkojeh jyehi tááhust — oroččij lemin eenâb pargo, mut čuovâ maid lassân ubâ paje. Šadda uáli huáppus kiđđâ, mut vyerdimist láá meiddei hirmâd mielâkiddiivliih já jiereskittes ohoh, moi pirrâ jiem val eeđâ täđi eenâb. Horgâ toh tiätuškyettih taan blogist še 🙂

Pyeri eehidjotkâ lohheidân já tiervuođah Oulust!