Fárrejin ođđa vissui juovlamánu álggobealde, inge astan dalle olu fuolahit gálvvuid deike obdal vulgen juovlalupmui. Dál ođđajagimánu loahppageažes mus ii velge leat olu eará go girjehildu ja guokte madrassa. Dán giđđadálvvi hástalussin lean bidjan alccen oastit viessogálvvuid: inge oaččo dušše buot hálbbimusa váldit njuolggut, muhto ferten smiehttat makkár diŋggaid duođai gillen geavahit ja geahččat váikko jo moadde jagige.
Ja nu buorre livččii oastit maid sámečiŋaid orrunbáikái, muhto hui unnán orru leamen. Nimmorastten olles beaivvi, go lea nu váttis — aŋkke jus ii fuola bohccočorvviid dahje -duljjiid. Mun in. Ja daid Seija Ranttila fiinna ivdnás Finlayson-gággáid ii oaččo šat gostige. Vuoi vuoi…
Manneson leage váttis gávdnat otnábeai máilbmái oaivvilduvvon sápmelaš design-diŋggaid? Leatgo mii nu uhca álbmot ahte ii oktageardanit leat márkan iige kapasitehttage hábmet ja vuovdit juoidá eará? Blaahh, ii sáhte leat nu ahte bohccot leat áidna hearvá man gánneha bargat. Jáhkán leat olu earáge sápmelaš (ja ii-sápmelaš!!) dáloeamidat váillaheamin juoidá earáge go daid seammá ikeaid ja marimekkoid maid leat geahččan juo moaddelot jagi, geat hui millosit bijašedje ruđaideaset sápmelaš hábmemii. Ammason datge ášši ovdána áiggi mielde…
Gávdnen goit áibbas soaittahagas guokte oahpeslágan guoddáolggoža — iežan lagamus Siwas. Ahte lea mus goit juoga sámediŋggaid dál váikko beavdige vel váilu. Fuonibutge sáhttá mannat!
Boahtte váhkus oainnán dasto Oulu fálaldaga buorebut. Diŋggathan eai dán máilmmes noga!