Eehidjurduuh tutkâmsajattuvâst

Mun lam tääbbin tutkâmsajattuvâst asâdijnân karttâm meid totken, já mun lam-uv tutkâm jieččân já tom maht lam-uv teehi juovdâm. Mun lam eellimstân karttâm jotteeđ tuohu teehi tegu maaŋgah iäráseh-uv. Tääl ko láá vuod moonnâm maaŋgâ ive nuuvt, ete lam varriistâllâm muádi mánuppaje kooskâi, oro aaibâs mielâttes hitruu ko piäsá viijmâg váhá rávhuduđ já rähtiđ monnii saajeest pyere já makkuutteijee, taggaar moos lii hitruu maccâđ määđhi maŋa teikkâ veik ehidist pargoost.

Juurdâ pääihist, mast ij tállân taarbâš vyelgiđ, lii lamaš mielâst jo váhá ääigi. Tääl oro, et tot lii aainâs motomij oosij kavnum. Must lii láigusopâmuš kale tuš ive kiäčán, mut tot-uv lii kuhheeb ääigi ko mon lam kosten oovtâ saajeest aassâm kuhes ááigán. Eellim lii ton tááhust ennuv täsivub.

Já ko pääihist kalga leđe peenuv, te must lii tääl muádi oho verd äigi rahttâttâđ toos, ete munjin puátá peenuv! Uccâ viälppáš! Ohtâ uábi pennuu viälppáin värree teehi juovlâmáánu aalgâst. Mun lam máksám väridemmáávsu já havâškuáttám penuvtiiŋgâid, mut stuárráámus pargo lii vaarâ jieččân uáivi siste. Já vissásávt maaŋgah ääših šaddeh vala illâttiđ muu ovdil ko tot kiergân ubâ rávásmuđ. Onne mun elâččim kolliimin taid, já puohâin lijjii jo čalmeh áávus, já toh lihâdii jo ennuv eenâb já virkkuubeht ko muádi peeivi tassaaš! 😍

Nuuvt ete forgâ taat šadda päikkin meid pennui. Ij tuše munjin. Motomijd tiiŋgâid tegu tivrâs lätteeráánu uážžu vala čurgiđ meddâl tâi stelliđ pyereeb sajan, mut ij tääbbin oro lemin ennuv mon vielpis puávtáččij pillediđ tâi moos tot puávtáččij jieijâs lammiđ. Olgos piäsá ain já tobbeen lii vijđes šiljo mon tutkâđ, veik muotâ tom luávdá-uv forgâ. Tuáivu mield tot meid makkuuškuát Ááná pennuigijn, veik toh láá-uv stuárráábeh já váhá eresluándusiih ko puásuipennuuh.

Lišketipšomist čálám nube tove, veikkâ lopedim-uv jo čalluu ”forgâ”. Keevâi nuuvt, ete tot meikkiputestemaamnâs mon táválávt kiävtám ij lekken innig puoh pyeremus munjin, já muu lavtâsmittemvuoidâseh iä innig pijssáá, nuuvt ete mun lam lasettâm tääl ehidij iđedij vuoidâsáid argaanoljo. Lasseen mun halijdâm keččâliđ vistig oljovuoidâsputestem ovdil ko čálám maiden. Taan ive puolâšeh tobdoh muu nirveest korrâsubboht ko kuássin ovdil, já tääl lam ferttim heiviitškyettiđ jieččân lišketipšomtaavijd iveááigán vuossâmuu keerdi.

Čyevgee čäcivuošân!! Puoh toh utkeh-uv :D
Čyevgee čäcivuošân! Puoh toh utkeh-uv 😀

Taan oho postâ lii jo kiergânâm pyehtiđ oovtâ uđđâ päikkitiiŋgâ – čäcivuošân mast puáhtá valjiđ liegâsvuođâtile moos čääsi lieggit, já mast láá (illâttâssân munjin) meid čuovah moh pyelih jieškote-uv ivnijn ton mield, mon cekkimere mašinân addel. 80 cekkid lii ruánáá já čyeti vist ruopsâd (kooveest). Jiem kal lääiti. Stellejim uáđđimviste siäinán laasâ vuoluubel olssân Ikea Alex -ilddee tegu meikkipevdin (kove vuoluubeln), já mudoi tot lii kale pyeri, mut jiem lyeti tooid Ikea seinicoggijd eissigin. Adai tääl lii eelliđ ryevdikäävpist já uástiđ nanosub coogijd já kuhheeb sruuvâid ovdil ko oles hátárâh kačča já cuovkkân puoh meikijgijn.

img_1057
Meikkipevdi já mučis uáinus Mudusjäävri tavekiäčán

Mun vuárdám vala poostâ pyehtiđ val sohvápeevdi, lávgumviste lätteeráánu ja motomijd tavluilddeid. Jiärmáliih uástuseh iänááš, mut marmorist rahtum čuoppâmlyevdi ij lam kal liijkás vijses valjim. Ijhân tom alne pyevti maiden čuoppâđgin! (Muččâd kal lii…) Tehálumos taan oho hommáin táiđá peenuv- já pargoaašij maŋa leđe kuittâg auto ABS-kosânij tivvoom, já mun ruhâdâlâm jyehi eehid ovdil nohádem ete váddu lii tuše andurist ige ABS-motorist. Tuorâstuv tom tiätá.