Rähis lohheeh: Loppâoho smiŋkkâpuddâ!

Bloggiimpuddâ kukkojii loopâst hirmâdávt, mut tääl oroi äigi čäliškyettiđ. Uáinâh ovdeeb iijâ oinim ponemuu päinijáá! Jiem lah kuhes ááigán ubâ muštámgin mii lašgin tábáhtum muu naharijn, muu taat paldâttij muu vuáđulávt. Nievdim, ete lijjim kostnii škoovlâst já kuođđim smiŋkkâseehân hiivsig peevdi oolâ. Vuolgim tost kuusnii porgâđ maidnii, jeđe fakkist muštim, ete smiiŋkah päccii, já mäccim viežžâđ taid. Smiŋkkâsekkâ lâi val tobbeen — mut tot lâi kuárus. Vuoi tom palo já epituáivu kieŋâlvuođâ!

Luhhoost koccájim já iberdim jotelávt, ete päinijâš tot tuš lâi. Moonnâm okko lâi munjin tuođâlâš epiluho okko ko läpittim tiiŋgâidân (já ruuđâidân) masa jyehi peeivi, ovdâmerkkân silbâsuormâsáid keevâi tegu smiiŋkáid päinijáást já toh päccii kuusnii oovdâskode nisonijhiivsigân — iäge innig kavnum ko moonnim maassâd toid uuccâđ. Jurdâččim anyways, ete ko tot smiŋkkâsekkâ kerdi lii nuuvt tiivrâs, te tom kalga tiävstuv lekkâđ váhá!

image

Sekkâ jieš lii ruopsâd poovsâhámásâš já váhá čunžáá, já eidu tanen ostim-uv tom. Toos čäheh pyerest viisut maid laaviim piäiválávt kevttiđ.

Mii tobbeen talle lii?

image

Hourglass Veil Mineral Primer smiŋkkâvuáđudâs mon ostim Ottawa reeisust. Tuođâi pyeremus vuáđudâs mon lam kuássin kiävttám! Tiivrâs mut jiem kaađâ ollágin.

Maybelline Instant Age Rewind čievâin (čiehâmâs?), mon ostim meid Ottawast. Hirmâd šiev čoolmij vyelni já hälbi — ijge taam uážu tiäđustgin Suomâst, blaah.

NYX Stay Matte But Not Flat smiŋkkâpuuter. Lijkkuum já kiävtám piäiválávt talle ko smiŋkkiim, jogo ohtuunis teikkâ olmâ smiŋkkâvuoidâs alne. Muu liške lii nuuvt eljuu ete puteristmist jiem kal taarbâš poollâđ!

NYX Tango With Bronzing Powder (When Leopard Gets a Tan) — Taat kolgâččij maka leđe rušmostâs ađai bronzer, mut tot lii nuuvt čuovgâd ete munjin tot tuáimá pyerebeht tegu ruopsânjšiälgám? oovtâst. Lijkkuum taas, tot lii muččâd sehe skuápustis ete muáđuin.

e.l.f. Studio Contouring Blush & Bronzer (St Lucia). Ruopsânj- já rušmostâspaaleet mii lii lamaš kiävtust jo paijeel ive, tego vissâ uáinoo-uv. Ruopsânj lii váhá fámuttem muu muáđuin, mut rušmostâs uáli pyeri! Kuohtuuh šuávoh váhá, mut toigijn uážžu kuittâg muáđoid uáli luándulii liegâsvuođâ.

image

Puáris já pyereest palvâlâm Rimmel Professional Eyebrow Pencilkulmepennâ (004 Black/Brown). Jiem tuođâigin ibbeerd manen jyehi áinoo smiŋkkâirâttâs haalijd nabdeđ jyehi áinoo puohtus professionalin. Täi aaigijd tot ij meerhâš innig maiden. Na, pennâ lii lamâš ubâ pyeri já kustâ koorkâst anolâš.

Kyehti čäcijehhee Sephora Retractable Eyeliner čalmeraijimpeenâ, taah še Kanada puáhtámušeh: ruáná 06 Olive sehe ruškâd 10 Matte Brown/Black. Lijkkuum taid še, muđoi toh iä liččii seehâst ollágin; peenah láá smiäruh já vuáimásivnásiih, iäge toh leevvân pirrâ čoolmijd.

N.Y.C. City Curlsromâsivne. Taat lii kuásnii tiiláájum neetist já maavsij vaarrâ oles nelji dolláár, mut tost huolâhánnáá lam lamâš tutâvâš! Tot ij punttâluu ijge kavâgyet, já veik lam kiävttám tom muádi mánuppaje, tot ij lah valagin kuškâm, já lii uáli muččâd rommâsijn.

Já val loopâst tiäđust-uv Ibero anolâš roomâs– já kulmesovskustâ sehe româssuujâin sehe pävirpuutervihko, mii lii uáli anolâš puoh eljusmuáđuháid talle ko muáđuh šiälguškyettih peeivi mield.

image

Tääl ko must lii tot leopard, jiem keevti taam nuuvt távjá, mut motomin toppiim mield Hourglass Ambient Lighting Powder -šiälgám. Tot lii nuuvt luándulâš já muččâd muáđuin ete ij pyevti ko imâštâllâđ. Sleek MakeUP Eye & Cheek Palette, mast láá nelji luomâivne já kyehti ruopsânj, lii meiddei anolâš. Áinoo hyenes peeli tast lii, ete tom siisâ ij čaavâ mihheen olmâ njuođânjijd.

Tánávt šoodâi smiŋkkâpuudâst penttâ suorgiittemoopâ hárjuttâs. Smiŋkkâsäänih láá liijgás uccáá já toh iä lah pajemus prioriteet anarâškielâ sänirähtim- já standardisistempargoost, mut motomin toid še taarbâš tanen ko vaarâ kuittâg 50% anarâškielâgijn še kevttih smiiŋkâ já motomin kenski halijdeh sárnuđge toid pirrâ. Täst val listo saanijn, maid lam irâttâm rähtiđ ko jiem kavnâm kosten:

  • smiŋkkâvuáđudâs — suom. meikinpohjustus, eŋg. primer
  • čievâin, čiehâmâs — suom. peiteväri, eŋg, concealer
  • smiŋkkâpuuter — suom. meikkipuuteri, eŋg. powder foundation
  • smiŋkkâvuoidâs — suom. meikkivoide, eŋg. foundation
  • rušmostâs — suom. aurinkopuuteri, eŋg. bronzer
  • ruopsânj — suom. poskipuna, eŋg. blush, blusher
  • šiälgám — suom. korostusväri, valopuuteri, eŋg. highlighter. Taat lâi puoh vaigâdumos jiemge lah vises lii-uv kuábbástgin mihheen jiermijd.
  • kulmepennâ (ij tađe imâšlub!) — suom. kulmakynä, eŋg. brow pencil
  • čalmeraijimpennâ — suom. silmänrajauskynä, eŋg. eyeliner pen. Tast jurdâččim maid almolub teermâ čalmeraaijâm, ko iähân toh lah tuš peenah moin raijip čoolmijdân. Rajâmeh pyehtih leđe kolgoseh, geelih já putereh še!
  • româsivne — illâttâs illâttâs, suom. ripsiväri, eŋg. mascara.
  • româssuujâin — suom. ripsentaivutin, eŋg. eyelash curler
  • njuođâin — suom. sivellin, eŋg. brush. Jiem kavnâm taam sääni kosten veik tot tarbâšuvá ennuv eres-uv ohtâvuođâin, ete jis kiinii tiätá mottoom pyereeb já vuáhádum sääni, muštâl munjin!

Jis kiästnii laš macâttâs taid saanijd pirrâ teikkâ pyerebeh iävtuttâsah, ličij hirmâd šiev kuullâđ já savâstâllâđ! 🙂 Iäge taah lah áinooh moid puáhtá val tarbâšiđ. Muu listoost váilu poovsâmaalâ — sehe tanen, ko tot lii jo utkum, ete tanen ko jiem laavii kevttiđ jyehi peeivi. Mut motomin!