Motomeh láá onne skužestâm tšitterist ađai civkkânist kuávdášpiäláduv Suomenmaa-loostâst adelum luuhâmháástust. Tasthân kalga luuhâđ tiäđust-uv ton piäládâhân lahtojeijee kiirjijd, já hástuceehih láá ohtsis love.

Luuhâmháástuin stuárráámus já pegâlmumos Helmet-luuhâmháástust láá VITTLOV cekkid, já ton čođâldittem ij tääiđi leđe realistlâš aaibâs puohháid, kiäh loheh tuše tyellittälli maidnii mii kietân tiäivá. Tot lii kuittâg pyeri tondiet, ete tast vissásávt finnee luuhâmavžuuttâsâid já moovtâ veikâ ton ij čođâlditáččijgin.

Mutâ.

Tast lii OHTÂ čyegis mii kuáská sämmilijd.

Arvâlim tane, ete ton Suomenmaa rähtim ucceeb luuhâmháástu ličij viehâ älkkee heiviittiđ sämmiláid lahtojeijen! Ađai taa lii muu versio love ceehi luuhâmháástust, mii kolgâččij heiviđ meiddei toid kiäh loheh uccáá já harvii.

Hástučuágáh láá viehâ njuolgist suáládum Suomenmaa saavâst já heiviittum sämmiláid, mutâ tomhân puávtáččij meiddei jurdâččiđ eresnáál. Ađai jis kestnii ležeh pyerebeht sämmiláid heivejeijee luuhâmiävtuttâsah, piejâ aainâs viestâ tâi komment!

Adeliđ aainâs meiddei jieijâd kirjeavžuuttâsâid jieškote-uv čuággáid – mun ááigum aainâs jyehiđ jieččân oonâid forgâpalij.

Hástučuágáh:

1. Kirje, mon sämmilâš avžuut
2. Kirje, mon sämmilâš lii piälkkám
3. Kir­je, mast ohtân persovnân lii mield Áillohaš
4. Kir­je, mon lohheest lii puásui, kuávžur tâi eres sämmiláid tehálâš iäláán
5. Sämikielâlâš kirje
6. Kir­je, mon tábáhtusah láá iänááš ärbivuáválii sämikuávlu siste
7. Kir­je, mon noomâst lii sääni ”ärbivyehi”
8. Mottoom sämmilii jieijâs eellimmaainâs tâi eellimkerdi
9. Pedar Jalvi tâi Áillohaš čäällim kirje
10. Kir­je, mii kieđâvuš Pedar Jalvi tâi Áillohaš

Jeđe val bonusčuágáh vâi tain šadda tievâs ihe oovtâ kirje mánuliävttoin:

11. Kirje mii muštâl sämmilii/sämmilij asodâhelimist
12. Kirje mii muštâl máádás varrimist

Puávtáh še luođiđ olssâd listo tain čuággáin já merkkiđ toos maid lah luuhâm já kuás: Sämmilâš luuhâmhástu 2020 (PDF)