Ožžum oho tassááš siäsástân oovtâ taggáár Facebookist jorree positiivlâšvuotâháástu. Tondiet kolgim jyehi peeivi listeđ kulmâ ääši moh láá lamaš peeivist pyereh teikkâ muđoi láá pyeredâm muu mielâ. Já kal toh kávnojeh, tiävstuv. Hyelhih, peerâ, usteveh, mučis kiđđâšiäráduvah, já nuuvt ain. Mut stuárrámus iäru jyehipiäiválii pyeri mielân taan háástust lâi, ete aašijd álgá anneeđ stuárráb áárvust ko toid tuođâid tiätumielâlávt juurdâč.

Tost lii stuorrâ merhâšume, eromâsávt ko mun lam vissâ pärnivuođâ rääjist killám šlundevuođâst. Tot viggá keessiđ ulmuu vuálus já toollâđ kejâstuv nuuvt alda eennâm ete ij innig uáini oovdâskulij, ij uáini elimistis ijge pirrâsistis mihheen merhâšumijd, ij uážu innig ilo masten. Šlundevuotâ lij mirhâlâš skippáár kote kiälástâl já kiälástâl vâi olmooš ij oskoččij alnestis ijge iärrásijn maiden puorijd, já vyerdiškuáđáččij tuš puoh hiäjuid.

Must kollii varrâ paijeel love ihheed tom maŋa ko lijjim iberdâm mii muu väivid ovdil ko mättim ubâ uuccâđ toos iše já torjuu. Luhhoost ääših láá tääl pyerebeht, já lam uážžum torjuu, jiemge ane innig eellim tuššen. Mut kal tot váátá ennuv pargo veik ličij mon pyeri toorjâjuávkku tyehin. Ohtâ vyehi porgâđ šlundevuođâ vuástá (vuám: tom muddoost ko jyehipiäiváliih ääših láá mahtnii oornigist já tabdâ lii haldâšum) lii tiätumielâlávt tuástuđ negatiivlii jurduid já karveđ taavijd, media já ulmuid kiäh läävejih nanosmittiđ negatiivlii jurdâččâmmyensterijd. Orroos talle veikkâ miinii jyevdilâs tegu Facebook-hástu: ko olmooš lii iällám šlundevuođâin, kalga oppâđ aitârdiđ jyehi peyri ääši, puoh ucemušâst puoh stuárrámuššân.

Tot lâi-uv áinoo pargo moos älgim pessijáid ääigi, muđoi viäluttillim já keččim Netflix. Já loopâst váhá movtáskim čurgiđ jieččân áinoo skaapi já moonnâđ varrimkaasâid siskáldâs čoođâ, puátusin váhá kuárrusub aassâmpäikki. Ennuv lii val čurgihánnáá, mut lii pyeri tobdo ko tiätá, ete masten kaasâst ij innig vyerdi selvâtmettum päävir- teikkâ skuottâlaađâ. Tegu mielâ-uv ličij čielgâsub. 🙂